Baca Juga
Oleh: Pinto Janir
Sabalun sampai di muko rumah, perasaan Yanti tatap indak lamak. Inyo sabana cameh. Hujan malam makin dareh sajo . Samantaro, pikiran Rundi baputa-puta kaniak ka ingkin. Saputa ka Yanti. Saputa lai ka Ijah. Bertahun derita perpisahan yang nyo alami jo Yanti. Salamo itu pulo Yanti selalu dalam hati dan tagok di ruang pangananyo.
Kalau bicara soal tanggung-jawabnyo ka Saijah, raso-rasonyo dek Rundi alah labiah dari cukuik. Rumah lah dibuek-annyo untuak Saijah jo anak-anak. Balanjo indak pernah kurang. Bahkan acok inyo labiahkan. Malah mulai dari adik-adik kanduang sampai ka adik-adik sepupu Saijah bagai, inyo kamehan biaya sakolah jo biaya kuliahnyo dek Rundi. Kaduo urang tuo Saijah alah inyo umrohkan bagai.
A juo lai,Jah?
Uang deposito untuak maso depan anak-anak dan Saijah, alah pulo inyo siapkan. Apo lai nan kurang, Jah? Raso-rasonyo, Rundi lah labiah daripado cukuik mambari kebahagiaan untuk Ijah. Baitu kato hati Rundi.
Kini ko inyo ingin mambari kebahagian pado diri sendiri. Apo iko salah?
“ Da….”, Yanti mangajuik an lamunan Rundi. Sabab, katikok oto lah baranti di muko rumah, nan Rundi ko masih tetap diam. Sabananya Yanti tahu kalau Rundi sadang dalam kecamuk lain. Yanti tahu baraso Rundi tantu mamikiakan bininyo. Tapi, ba-a lah, inyo pun cameh pulo mambiakan Rundi pulang dalam keadaan ase oto nan macet di tangah hujan labek nan makin manggilo. Kalau inyo biakan Rundi pulang, kalau tajadi apo-apo ka diri Rundi, Yanti tak mau manyasa saumua hiduik.
“ Da……!” sakali lai Yanti mangajuik an lamunan Rundi jo manapuak lambek bahu kiri Rundi.
“ Oh….yo “, agak tagagau Rundi snek.
Sudah tu Yanti mangecek jo suaro agak mahibo; “ Uda, ndak usah uda kini pulang ka Bukittinggi, rancak Uda tunggu sampai bisuak pagi…..Hujan masih labek Da…Ase oto uda indak pulo elok….”.
Ko bajaleh-jaleh se lah awak kini dih. Nan sabana-bananyo bana, indak adoh bagai ase oto Rundi rusak doh. Masak, Pajero baru asenyo rusak. Nan ka iyo se lah. Sajak barangkek dari rumah bako Yanti tadi, sangajo Rundi indak maiduik-an asenyo. Nan Yanti indak pulo mamparatikan bana. Rundi hanyo ingin tahu, sagadang apo kekhawatirannyo pado diri Rundi. Apo Yanti lai ko lah manahan inyo supayo ijan pulang dulu ka Bukittinggi atau indak?
Rundi sabana baharok Yanti manahan inyo. Tanyato harapannyo manjadi nyato. Tanyato juo iyo ruponyo. Yanti manahannyo. Memang, apo nan dilakukan Rundi ko barisiko tinggi.mamatikan ase di tangah hujan itu babayo. Inyo tahu tu. Tapi, untuak sebuah jawaban hati, risiko tinggi tu lah nyo hadang. Indak inyo hiduik an ase, inyo kecek an rusak. E….alah !
Rundi manjadi tahu kini, tanyato pulo, Yanti sangaik mengkhawatirkan diri Rundi. Samantaro Ijah, indak pernah mengkhawatirkan Rundi. Kalau Rundi pai, yo pai surang se lah. Asal pulang lai salamaik. Baitu prinsip Ijah balaki. Inyo picayo saratuih persen ka Rundi. Sangaik picayo. Makonyo inyo indak paralu banyak tanyo.
Ijah…Ijah. Kalau ka padusi lain, mungkin Rundi bisa dipicayo saratuih persen.Agak co patuih gai rancak e padusi ko, haram Rundi ka tadayo. Ijah tahu tu. Tapi adoh nan indak nyo ketahui dek Ijah, yakni soal Yanti. Rundi tak pernah manyabuik-nyabuik pacar lamonyo ka Ijah.
Makonyo tak adoh alasan Ijah untuk mengkhawatirkan lakinyo ka baraliah ka nan lain.
Kadang-kadang seorang laki memang butuh pulo untuk dikhawatir-khawatirkan. Katikok Yanti mengkhawatirkan Rundi, makin dalam sayang Rundi ka Yanti. Makin tacurah juo hatinyo ka pacar lamo ko. Inyo marasao sabana sajiwa bana, marasao sabana cocok bana, mara sabana bakasasuaian bana jo Yanti. A juo lai, induak kato dari cinto sajati tu adolah cocok. Cocok d hati , cocok di jiwa nyaman di raso.
Kini Rundi ingin membahagiakan diri sendiri. Keputusan Rundi adolah , inyo pulang bisuak pagi ka Bukittinggi.
“ Ba-a kok Uda diam sajo. Yanti indak rilakan Uda bajalan dalam keadaan ase rusak manampuah hujan. Babahayo , Da. Mambana Yanti, uda tunggulah bisuak pagi dih Da “.
Mandanga Yanti mambana takah itu, bantuak urang bahibo-hibo, indak sampai hati pulo Rundi manjawek nan indak sasuai jo harapan Yanti.
“ Iyo.Uda di Padang. Uda pagi ka Bukittinggi”.
Mandanga kato pasti dari Rundi, Yanti tersenyum dengan wajah nan sangaik bahagia.
Sudah tu Rundi bakato. Nyo pandang wajah Yanti jo kasiah sayang. Yanti manunduak. Lambek-lambek nyo sandakan kapalonyo ka bahu kiri Rundi. Sadang oto masih hiduik juo baru. Kaco oto alun dibukak. Masih tatap baranti di muko rumah Yanti.
“ Uda, nginap di hotel sajo !” kato Rundi sambia membelai mesra rambuik Yanti.
Yanti memandang ke Rundi. “ Uda lalok di siko sajolah. Kamar kan banyak. Uda bisa lalok di kamar subalah”.
Rundi maangguk. Oto tu lansuang masuak ka garase rumah Yanti nan kosong.
Tanyato cinto mambuek urang manjadi sagalo barani. Cinto melenyapkan raso takuik. Cinto kalau sadang mambaro, satinggi apopun risiko akan inyo hadang surang . Rundi mulai bapikia gilo, ah di ma ka tibo se lah heh. Bukankah inyo alah lamo mananam cinto ka Yanti, apo salahnyo kalau kini inyo manyiangi. Di ma tumbuah di sinan di siangi. Di ma ka tibo se lah, baitu bisik hatinyo.
Baitu tibo di rumah, Yanti lansuang manunjuak an di ma kamar untuak Rundi, tapek bana di subalah kamarnyo.
Sabananyo Rundi gugup jo gagik. Saumua-umua, sajak manikah jo Ijah, balun pernah inyo nginap di rumah padusi lain. Walaupun indak sakamar bagai, tapi rumah ko sadang kosong. Salah satu tujuan Yanti ka Padang adolah untuak maurus rumah ko. Salamo ko rumah papanyo ko dikontrakkan pado sebuah perusahaan. Kontraknyo lah habis kini. Makonyo kosong.
Baduo jo pacar lamo di rumah kosong, sia lo pulo nan indak ka badabok-dabok darahnyo. Badabok ba-a ka indak, hujan di lua makin indak basiagak. Baranti sabanta, sudah tu nyo tutuh lo dek hujan labek baliak.
Sabalun masuak ka kamar, Yanti mambarikan Rundi baju ganti.
“ Uda pakai sajo iko dulu “, Yanti mambarikan baju kaos oblong ka Rundi.
Rundi paliang indak bisa lalok pakai sawa jin. Makonyo inyo batanyo ka Yanti.
“Yanti, adoh sarawa pendek, hawai indak juo ba-a doh !”.
“Tunggu sabanta, Yanti carikan dulu “.
Yanti masuak ka kamar mausai kopornyo.Samantaro Rundi tagak mamatuang di muko pintu kamar tu. Indak lamo sudah tu, Yanti kalua mambaok an sarawa pendek hawai.
“Untuang adoh ko Da. Tapi, iko iyo sabana-bana sarawa dari Hawaii bana mah Da….!” kato Yanti sambia maagiahan sarawa tu ka tangan Rundi. Sarawa tu di bali Yanti iyo sabana di Hawaii, wakatu inyo pai liburan jo almarhum lakinyo, Satrio .
“Sabalun uda lalok, Yanti buek an uda kopi dulu dih “, kecek Yanti sambia balalu ka dapua sabalun sempat Rundi maiyokan.
Indak lamo sudah tu kopi tibo. Duo insan pacar lamo ko maota-ota di ruang tangah.Mulai dari soal nostalgia SMP hinggo maota-ota mengenai musik. Urang baduo ko salero musiknyo samo.Samo-samo suko ka jazz dan blues.
Adoh sekitar sajam Yanti dan Rundi maota-ota lamak di ruang tangah tu. Walau urang ko gaya maotanya bantuak data-data sajo, tapi duo urang ko samo-samo bakacamuak jo pilinan raso. Walau duduaknyo bajarak dibatehi meja kaco kristal, namun perasaan dan hasrat mereka untuak duduak labiah dakek tak bisa didutoi. Mungkin urang ko masih samo-samo batahan. Rundi batahan, Yanti baitu pulo. Namun debar di dado makin kancang.Samo kancang ka duonyo.
Rundi sayang ka Yanti. Itu kato lah pasti. Tapi apo bisa dipastikan urang ko bisa menjinakkan gelora dan hasrat nan kian manggilo di dado? Kecek urang, rindu kalau alah tajawek, inyo akan manjadi hamba sajo. Inyo akan manjadi biaso. Rindu nan paliang manis adolah rindu nan indak kunjuang tajawek. Cinto itu misteri.Indahnyo justru katikok indak tajawek. Tanyato pandapek ko salah. Rundi dan Yanti bahkan makin bergelora sekalipun cinto dan rindu mereka lah tajawek kini. Rindu sepasang pacar lamo ko agaknya indak pudua-pudua sekalipun hujan dan angina dareh di lua.
Malam tu Yanti baharok, Rundi duduak di subalahnyo. Lalu mamaluaknyo dalam kemesraan. Lalu…..lalu…dan lalu….
Apo yang diharokkan Yanti, sabananyo adolah apo nan adoh dalam pikiran Rundi. Inyo ingin mamaluak Yanti. Hanyo mamaluak sajo. Indak labiah. Tapi itu tak dilakukannyo karano inyo takuik Yanti menganggapnyo sebagai laki-laki nan lah biaso bamacam-macam jo padusi lain. Sumpah, Rundi indak pernah berselingkuh dan mengkhianati Ijah.
Kini Rundi jo Yanti, baduo-duo sajak siang tadi, apo iko indak basalingkuah namonyo tu? Apo iko indak bakhianat ka bini namonyo ko? Rundi baparang jo kato hati surang.
Antah ba-a ko lah, Rundi indak pernah samiang pun menganggap iko sebuah perselingkuhan.Indak pernah maraso inyo alah berkhianat ka Ijah. Apo sababnyo? Karano bagi Rundi , Yanti adolah jiwanyo.Adolah rindunyo. Adolah cinto sajatinyo. Adolah urang nan salamo ko selalu ado di hatinyo nan paliang dalam.
Ijah ba-a?
Ijah tu jodoh. Jodoh? Ya, Ijah di mata Rundi tak lebih sebagai jodoh. Jodoh balun tantu cinto, cinto balun tantu jodoh. Kalau iko nan adoh dalam pikiran Rundi, jadi Ijah adoh di subalah hatinyo nan ma? Apo sekedar sayang? Atau indak cinto samo sakali? Kalau indak, ba-a kok sampai baranak Ijah sampai duo kali dek Rundi?
Ruang nan langang dan haniang tu hanyo ramai dan ribuik dan kalebuik di hati surang-surang.
Yanti dan Rundi samo-samo tadiam. Samo-samo tapatuang. Urang ko sibuk jo pikiran masiang-masiang. Sampai akhirnyo, Yanti minta pamit untuak segera ke kamarnyo.
“Uda, Yanti tidua dulu dih”.
“Yo, tidua lah Yanti dulu. Uda habiskan rokok sabatang ko dulu !”
Ondeh, iyo sabana kecewa Yanti mandanga jawaban Rundi. Padohal, inyo baharok, sabalun masuak kamar, Rundi tagak lalu mamaluaknyo. Tapi itu ba-a kok indak dilakukan pacar lamonyo ko.Kecewa Yanti. Rundi tatap juo asik seperti manikmati rokoknyo.
Apo nan tampak indak takah nan tajadi. Padohal, indak baitu bagai doh. Rundi sadang manggigia surang dalam hati. Manggigia ba-a nan ka indak. Ko pacar lamo adoh di muko. Pacar lamo ko makin lamo dipandang makin rancak juo. Hampiang tak adoh kekurangan pado sabatang tubuh Yanti. Bantuak tubuh Yanti adolah bantuak tubuah nan sangaik diidam-idamkan dek kebanyakan laki-laki.
Yanti berlalu.Inyo lah masuak ka kamar dengan hati kecewa. Nyo ganti bajunyo jo gaun tidua warna putiah bamerek Lingerie.Gaun ko alun sempat nyo pakai.Dulu gaun ko inyo bali di Amerika. Bahannyo santiang. Tipih dan sajuak dipakai. Balinyo bajuta-juta. Makin rancak tubuah Yanti baitu dibaluik gaun lalok bawarna putih ko.
Samantaro, Rundi manyambuang rokok sabatang lai.Inyo alun juo masuak kamar. Baitu habih nan sabatang ko, nyo sambuang lo baliak.Bantuak kareta api, putuih sambuang barang ko marokok.
Samantaro patuih manyamba-nyamba dilua. Yanti paliang takuik mandanga bunyi patuih jo guruah.Kini, takuiknyo ko inyo tahan surang sambia mamakok talingo jo mamiciangkan mato. Yanti maleh kalua.Inyo takuik bekoh Rundi manilainya macam-macam. Rancak inyo batahan sajo di kamar ko.
Samantaro Rundi baru sajo masuak ka kamar. Sabalun marabahan diri ka tampek tidua, nyo tuka baju jo sarawa jo nan diagiahkan dek Yanti tadi.
Pangana Rundi manarawang-narawang . Inyo takah urang maetong jarajak loteng nan indak bajirajak. Samantaro di Bukiktinggi, Ijah lah takalok di ruang tangah di muko tipi dek jak tadi manunggu laki nan alun pulang. Inyo indak punyo kebiasaan mahape laki.Ijah bukan tipe bini nan nyinyia nan tiok sabanta batanyo, di ma Da, jo sia Da, sadang manga Da, pulang lah lai Da…..model-model ko bukan tipe Ijah. Ijah ko tipe bini saulah. Indak pancuriga ka laki !
Samantaro di kamar subalah, Yanti seakan tak pueh-pueh barado dakek Rundi. Inyo malam ko ingin menghabiskan wakatu di sampiang Rundi.
Yanti bodinyo stabil dari gadih sampai lah baranak. Kalau dikatokan Yanti ko gadih, banyak urang nan picayo mah. Modis. Baitu pulo bodi Rundi. Biasonyo, urang kalau lah babini, nan paruik tibo sakali. Nan barek batambah pulo.Rundi indak baitu.Bodi Rundi tatap rancak. Apolagi, sajak SMP hinggo SMA Rundi ko andalan tim basket sekolahan dan jagok lo main bola.
Wakatu SMA Rundi tamasuak cowok nan diidolai dek para padusi. Idola ba-a nan kaindak, awak gagah, utak rancak pulo. Wajah Rundi bantuak-bantuak cowok Mexico agak saangin. Macho !
Maso SMA dulu, Desi anak anggota DPR RI sangaik tagilo-gilo ka Rundi. Desi rancak kok. Hiduang mancuang. Bibir tipih. Kulik kuniang lansek.Mato bulek bantuak bintang pilem India. Pernah Rundi agak-agak dakek jo Desi. Wakatu itu inyo batekat handak malupokan Yanti. Makonyo inyo bausaho pulo mandakek an diri ka Desi nan ka sikolah mambaok oto surang. Tiok pai sikolah, oto diparkirlkannyo di rumah Wati kawan dakeknyo nan tingga indak bara langkah dari sikolanyo.
Pernah Desi maajak Rundi pai jalan-jalan mamburu kuliner di Payakumbuh jo otonyo tu. Ijan salah.Rundi pandai kok mambaok oto. Kakak sepupu Rundi punyo angkot 06. Kalau sudah mancuci angkot tu, Rundi baraja mamajuan jo manyuruik an oto tu hinggo inyo lanca mambaok.
Katikok Rundi manulak mambaok oto Desi, itu bukan karano inyo indak pandai mambaok oto, tapi inyo takuik mambaok Honda Jazz Desi, takuik balantak. Balantak, jo apo kadiganti?
Hanyo tigo minggu luruih Rundi dakek jo Desi. Dek karano, minggu ka ampek, makin nyo cubo untuak malupokan Yanti, justru makin kareh pangana dan bayangan Yanti di ruang mato jo di hati. Makin inyo paso-pasoan malupokan Yanti, makin raso disayik-sayik sambilu raso hatinyo. Makonyo, indak sapatah kato pun inyo agiah kepastian ka Desi sampai Desi nan justru manyampaikan raso suko ka inyo. Tapi, dijawek Rundi, ancak awak bakawan sajo. Indak tangguang-tangguang kecewa hati Desi saat tu doh. Sajak tu, Desi tahu diri , inyo manjauh dari Rundi dengan mambaok luko di hati.
Mangana kaji lamo ko Rundi senyum-senyum surang. Urang nan inyo cintoi salamo ko, kini adoh di subalah kamarnyo.
Samantaro di lua, hujan bantuak basijadi tutunnyo.Sebagian dari kota Padang lah tarandam dek aia. Untuang rumah Yanti barado di tampek katinggian.
Tiba-tiba………..
Duaaaaaaar……!
Patuih tongga manggalaga. Yanti di dalam kamar tapakiak.
“Udaaaaaa!”
Inyo katakutan. Rundi lansuang mahambua ka lua. Nyo lansuang masuak ka kamar Yanti. Ruponyo kamar Yanti tu tak bakunci.
Inyo tagagau mancaliak Yanti nan mamakai gaun tidua warna putiah nan tipih. Samantaro, dek mati katakuik an mandanga patuih tongga nan sabana kareh, reflek Yanti mahambua ka palukan Rundi.
Ondeh Mak….!
Yanti mamaluak dek katakutan, Rundi manarimo palukan dek hasrat laki-laki. Kalau tangan Rundi bantuak urang istirahat di tempat grak, raso-rasonyo samo Rundi jo mandutoi diri surang. Kini ko inyo jujur. Nyo baleh pelukan Yanti. Dalam pelukan Rundi, Yanti marasokan kedamaian nan indak terwakilkan dek kato-kato.
“Uda…uda lalok di kamar ko sajolah…Yanti takuik !”
Ha? Lalok di kamar baduo?
“ Kan Uda bisa lalok di kursi sofa? “ lakeh-lakeh Yanti bakato dek karano adoh keraguan di hati Rundi.Keraguan tu Tabaco dek Yanti.
“ Mintak Uda salimuik Yanti, sagan Uda basarawa pendek!”
Kalau lah “Bauda” Rundi ka badannyo, lah ka gamang ayun di tali gantiang. Di ayun buai iyo lamak. Kalau tali nyo putuih, cilako nan katibo.
Yanti tagak manuju ka lamari di kamar tu. Tamanuang Rundi mancaliak Yanti bagaun lalok tipih. Anggun. Rundi mandaguak liu surang.
Yanti manjuluakan Rundi salimuik. Katikok manarimo salimuik dari tangan Yanti, caliak pandang Rundi alah gak lain. Dabok hati Yanti makin kancang. Katikok tangannyo ka maagiahan salimuik, tangannyo tu diganggam dek Rundi. Makin dakek.Makin tambah dakek. Dasah Yanti seakan jatuah ka ruang nan paliang dalam.
“Uda…!”
Tibo-tibo Yanti malapehkan palukan tu. Urang ko baranjak. Yanti baliak lalok ka ateh kasua, Rundi basilunjua ka ateh kurisi sofa.
Takah-takah adoh upayo urang ko bantuak saliang manahan.Mungkin iko nan dinamoi dengan siksaan nan indah.
Rancak juo tu, supayo bala jan tibo, makonyo rancak juo Rundi lalok di kursi sofa nan adoh di kamar tu. Nan indak bisa ditahankannyo adolah satiok mancaliak ka arah Yanti nan mamakai gaun tidua nan tipih tu nan indak basalimuik. Raso-rasonyo Rundi sadang barado di kamar pengantin di malam partamo sausai pesta.
Inyo pernah mancubo malam partamo jo Ijah. Rasonyo indak takah iko bana indahnyo doh. Sabab, di malam partamo tu Rundi justru sadang takana dan mambayangkan wajah Yanti. Wakatu malam partamo jo Ijah tu justru inyo mambayangkan diri, kalau sakironyo Ijah ko adolah Yanti tantu sempurna malam pengantinnyo.
Kini ko Yanti sakamar jo inyo. Tanyato hiduik ko pikiran. Apo nan dipikiakan dengan bana-banalambek lamo akan menjelma manjadi sebuah kenyataan. Nyo pandang Yanti sadang tiduanyo. Matonyo alah tapiciang. Sumpah, ma bisa Yanti lalok. Lah nyo cubo-cubo maciangkan matonyo, namun takah lirik lagu Minang, mato lalok hati batanggang. Lah sadakek tu Rundi darinyo, nan hanyo bajarak ampek langkah dari tampek tiduanyo, ka Rundi juo pangananyo baru lai. Rundi takah itu lo.
Lah nyo piciang-piciangan matonyo, pangananyo bantuak balando mintak tanah. Diagiah hati mintak jantuang. Diagiah lalok dikurisi sopa, mintak lalok di ateh tampek tidua taba.
E….alah!
Konyol Rundi tibo, inyo baharok supayo patuih nan karehnyo takah tadi, kok dapek tibo lo baliak sakali lai. Buliah mahambua Yanti ka inyo. Samantaro, Yanti baharok takah itu juo. Namun nan patuih ko indak lo kunjuang tibo-tibo.Patuih pantang diharok ruponyo. Tanpa alasan nan jaleh, Yanti malu pulo manyuruah Rundi lalok disubalahnyo. Inyo tahu, kurisi sofa ko panjangnyo gantuang pulo dari kaki Rundi. Pasti tidua Rundi indak nyenyak, baitu pikiran Yanti.
Kok kadisuruah Rundi lalok diateh kasua ko, terus terang, Yanti malu. Malu sebagai padusi. Malu dianggap Rundi anhe-aneh. Sumpah, Yanti indak pernah baduo-duo di kamar jo laki-laki lain selain jo almarhum suaminyo. Samantaro, patuih nan diharok tak kunjuang tibo.
Dalam hatinyo Rundi bapikia, mancari alasan nan tapek supayo bisa tidua di subalah Yanti. Inyo bae purak-purak gaelisah. Nyo lunjua-lunjua an kakinyo nan malabihi panjang kurisi sambia mamiciangan mato. Pas katikok samo-samo mambukak mato, pandangan urang ko baradu.
Indak dapek diagak. Kini Rundi baprinsip takah tadi, dima ka tibo se lah lai heh. Bekoh, bekoh lo dipikiakan. Nan jaleh inyo tagak dari kurisi, sudah tu nyo bajalan ampek langkah, tibo di subalah Yanti. Nyo lansuang lalok di sampiang Yanti.
Dabua dado Yanti samakin kareh. Rundi samakin kareh pulo, dabuanyo. Nyo mamandang ka Yanti. Yanti mambaleh dengan senyum nan paliang ngilu.
Hujan lah mulai rado agaknyo. Nan tasiso hanyo dinginnyo sajo.
Walau tidua basubalahan. Walau bahu suok jo kida lah saliang lakek. Walau gelora dan hasrat samakin dareh, namun Rundi ingin tetap bertahan. Sakatiko saketek kato bana tumbuah di hatinyo. Bahaso apo nan inyo lakukan iko adolah kaliru. Salah !
Inyo tagak dari tidua.
Lansuang Yanti bakato: “ Uda kama?”
Dijawek dek Rundi, “ Baru takana dek Uda, bahaso pagi ko uda adoh janji jo Syafri kawan bisnis Uda. Kami barencana ka mambukak SPBU di jalan raya Bukittinggi Payakumbuh nan bakonsep SPBU rekreasi!” .
Yanti tadiam. Adoh kekecewaan yang sangaik dalam di hatinyo.Raso kecewa tu nyo raguaknyo surang dalam hati taibo-ibo. Inyo maraso tagaing surang.
“Kan, bisa uda barangkek sudah subuah. Hari baru jam ampek Da !”
“Ragu Uda, bekoh telat “.
Sakali ko Yanti indak mampu manahan Rundi. Padohal inyo ingin lamo-lamo adoh di sampiang Rundi. Ingin lamo-lamo lalok di subalah Rundi, walau indak malakukan nan takah-takah itu bana. Baginyo, barado di sampiang Rundi adolah sesuatu nan sangaik indah.
Keindahan tu kini, lanyok sakatiko .Rundi lah manuka sawa hawai dan baju kaosnyo jo pakaiannyo samulo.
Inyo pamit ka Yanti. Yanti malapeh jo hati tagantuang. Nyo lapeh Rundi jo lambaian, tanpa pelukan tanpa kecupan di kening.Iko nan mambuek Yanti tapadiah. Inyo manggigik bibia malapeh Rundi pacar lamonyo.
Yanti masuak ka kamar. Aia matonyo jatuah.
Samantaro, Rundi malarikan otonyo jo kecepatan nan kancang. Kini tabayang dek inyo Ijah, dan duo anaknyo Grendi dan Suci.
Nyo takan gas sakancang-kancang antah. Antah ba-a ko lah, kini ko inyo ingin lakeh-lakeh tibo di rumah….
Makin nyo takan lari otonyo tu…..
(Basambuang) Bukittinggi 270520/12;13